बेस्ट स्टॉप... बेस्ट स्पॉट

मुंबईतील बेस्टची सेवा खरोखरच बेस्ट आहे. मग तो रस्त्यावरचा स्टॉप असो, नाही तर धावणारी बस. प्रेमाचे दोन शब्द बोलण्यासाठी आतुरलेल्या कपल्ससाठी या जागा म्हणजे हॉट स्पॉटच...

एखादा आडोशाचा स्टॉप शोधायचा... चांगली शेड, चार-दोन झाडांची सावली असलेला. बसेसची फ्रिक्वेन्सीही कमी असणारा. महत्त्वाचं म्हणजे दोघांच्याही घरापासून ब-यापैकी लांबच्या अंतरावरचा... शोधणाऱ्यांना असा स्टॉप सापडणं फारसं मुश्किल नाही. रविवार किंवा सुट्टीच्या दिवशी नरिमन पॉइण्ट, सीएसटी, कुलाबा परिसरात फेरफटका मारला तर पावलापावलावर अशा जागा सापडतील. दोन तास, तीन तास कितीही वेळ बसा तिथे. तुम्हाला साधं कुणी हटकणारही नाही. पार्काबिर्कात त्रास देणारे भिकारी, फेरीवाले, छक्के यापैकीही कुणी इथे येत नाही. तुम्ही आणि तुमचं माणूस फक्त.

एकाच जागी उभे राहून कंटाळा आला तर जी कुठली पुढची बस येईल, ती पकडायची. शक्यतो डबल डेकर, गदीर्ची वेळ टाळून. दुपारी किंवा सुट्टीच्या दिवशी बेस्टचा वरचा मजला रिकामाच असतो. दोन लास्ट स्टॉप सांगितलं की, कण्डक्टरही काय समजायचं ते समजून जातो. यंग कण्डक्टर असेल तर ठीक आहे, पण कुणी बुढ्ढाचार्य असेल तर जरा सांभाळून. कारण पिकलं पान तिकीट फाडता फाडता एखादा टोमणाही चिकटवतो. पण त्याकडे न चुकता कानाडोळा करायचा. काही प्रत्युत्तर द्यायचा प्रयत्न कराल तर फसाल. कण्डक्टरच नाही, बसमधले बाकीचेही तुम्हाला गिऱ्हाईक बनवतील.

साधी बस असेल, तर मागची सीट आणि डबल डेकर असेल तर वरच्या मजल्यावरची पुढची सीट अजिबात विसरायचं नाही हे. या सीटवर आरक्षित अशी पाटी लावलेली नसते. परंतु प्रेमी कपल्सनी आपल्या कर्तृत्त्वाने हे आरक्षण पदरात पाडून घेतलं आहे, याचा विसर पडू देऊ नका.

बेस्टची एसी सेवा म्हणजे कपल्ससाठी स्वर्गच... काळ्या काचांच्या, पडदे असलेल्या ए १ किंवा ए २ या गारेगार एसी बसेसमधून प्रिय व्यक्तीसोबत फिरण्याचा आनंद काही औरच आहे. तो शब्दांत वर्णन करताच येणार नाही. ज्या कुणा बेस्टच्या अधिकाऱ्याला ही कल्पना सुचली त्याला आमच्याकडून जादू की झप्पी... पण चांगल्याला चांगलं म्हणायची सोय नाही. कारण हल्ली बेस्टने किंगलाँगच्या नव्या एसी बसगाड्या रस्त्यावर आणल्या. एकदम पारदर्शक, निळसर काचांची ही बस दुदैर्वाने आपल्या कामाची नाही!

मुलीला प्रपोज करण्यासाठी आपण नेहमी चांगलं स्थळं आणि वेळ निवडतो. आपल्या एका मित्राने अशाच बेस्ट वारीमध्ये एकीला प्रपोज केलं होतं. तुम्हीही असं काही धाडस करणार असाल तर जरा जपून. कारण चुकूनमाकून पोरीने नकार दिला आणि बोंब केली, तर तुमची काही खैर नाही.

तेव्हा बेस्ट प्रेमासाठी बेस्टच, पण प्रपोज करणार असाल तर... अॅट युअर ओन रिस्क!

- सुनील घुमे