प्रेमाची सी लिंक

मुंबईच्या समुद्रावर कुणाची हुकूमत असेल तर प्रेमीजनांची. 'प्रेम करुया खुल्लम खुल्ला' हा इथला मंत्रा असतो. शाळा-कॉलेजमध्ये असताना फ्रेण्ड्ससोबत आणि प्रेमात पडल्यानंतर गर्लफ्रेण्डसोबत... पावलं वळतात ती सागरकिनारीच!

मायानगरी मुंबईच्या सौंदर्यात नवी भर पडलीय ती वांद्रे-वरळी सी लिंकची. महाराणीचा लखलखता नवा नेकलेसच जणू.

आजवर संध्याकाळच्या मावळत्या सूर्याला साक्षी ठेवून 'जिने-मरने की कसमे' खाणारी प्रेमी कपल्स. यापुढे त्यांच्या प्रेमाचा साक्षीदार असेल तो रात्रीच्या अंधारात लुकलुकत्या दिव्यांनी न्हाऊन निघालेला सी लिंक. समुद्रकिनारचा खारा वारा, उसळणा-या लाटांची गाज, समोरचा लुकलुकता केबल ब्रीज आणि सोबत हवीहवीशी ती... असा रोमॅण्टिक सीन आणखी कुठे असणार?

प्रेमी कपल्सचा मोर्चा शिवाजी पार्कच्या कट्ट्यावरुन चौपाटीजवळच्या गार्डनमध्ये शिरलाय तो उगाच नाही. समुद्र किनारा आणि प्रेमी कपल्स हे नातं एकदम अतूट. फेविकॉल का मजबूत जोड... टुटेगा नही. दादर, गिरगाव, जुहू चौपाटी, मरिन ड्राइव्ह, गेट वे ऑफ इंडिया, वरळी सी फेस, वांद्रे रेक्लमेशन, बॅण्डस्टॅण्ड, मार्वे-मनोरी, अक्सा, मढ ते पार अर्नाळा बीचपर्यंत... समुदावर कुणाची हुकूमत असेल तर प्रेमीजनांची. प्रेम करुया खुल्लम खुल्ला, हा इथला मंत्रा असतो. शाळा-कॉलेजमध्ये असताना फ्रेण्ड्ससोबत आणि प्रेमात पडल्यानंतर गर्लफ्रेण्डसोबत... पावलं वळतात ती सागरकिनारीच.

समुद्रावर गेल्यावर आधी एक मस्तपैकी राऊण्ड मारायचा. एका टोकापासून दुस-या टोकापर्यंत, हातात हात घालून. खरं तर राऊण्ड हे एक निमित्त असतं. कुठे चांगली आणि मोक्याची जागा मिळेल, याची उभ्या उभ्या केलेली ती पाहणीच. चाणाक्ष लोकांना ती पटकन सापडते. बाकीचे नुसतेच हेलपाटे घालून थकतात. कुणालाही सहज दिसणार नाही, अशी जागा पकडायची म्हणजे मोठं कसब असतं. एकदा असा कोपरा सापडला की, दिवस सार्थकी लागल्याचे भाव चेह-यावर उमटतात. पुढचे दोन-तीन तास आपण वेगळ्याच दुनियेत असतो...

याबाबतीत आपली शिवाजी पार्कची चौपाटी एकदम बेस्ट. तृतीयपंथी आणि टारगट पोरं सोडली तर बाकी काही त्रास नसतो. गिरगाव चौपाटीवर आडोसा असा उरलेलाच नाही. लोकमान्य टिळकांच्या पुतळ्यामागची गार्डनची जागा कशीबशी रिझर्व्हेशन टिकवून आहे. त्यात भरीला पोलिसांचा त्रास. त्यामुळे वाळूपेक्षा नाना-नानी पार्काशेजारचा कट्टाच चांगला. गिरगाव चौपाटीवर चांगलं काय असेल तर इथली खानपान सेवा. भेळपुरी प्लाझामध्ये जाऊन भय्याच्या गाडीवरची शेवपुरी, पाणीपुरी चाखायची किंवा बर्फाचा गोळा खायचा... अर्थात शेअर करुनच. ती गंमत एकदम भारी असते, पैसा वसूल!

मरिन ड्राइव्ह म्हणजे कॉलेजच्या पोरापोरींचा अड्डा. अगदी भल्या सकाळीच ही प्रीतीची पाखरं तिथे किलबिलाट करायला हजर असतात. बिच्चारे मॉर्निंग वॉकवाले... त्यांना ही प्रभात फेरी धावती का होईना, पण पाहावीच लागते. सकाळी आणि संध्याकाळी मुंबई दर्शनवाल्यांच्या बसेस इथल्या लोकसंख्येत भर घालतात. यूपी-बिहारमधून पहिल्यांदाच बम्बईला आलेल्या भाभी-भौजाई चौपाटीवर गळ्यात गळे घालून बसलेल्या पोरापोरींकडे टकामका पाहत बसतात. डोईवर पदर असला तरी त्यांचे चेह-याचे भाव खूप काही सांगून जातात. पावसात भिजत मरिन ड्राइव्हच्या कट्ट्यावर खवळलेला समुद्र पाहताना मज्जा येते. तिखटमीठ लावलेला, लिंबू पिळलेला भुट्टा दोघांत मिळून खाताना त्याची चव आणखी वाढते. राणीच्या रत्नहाराला खरी झळाळी येते ती रात्रीच्या वेळी. मरिन ड्राइव्हच्या फ्लायओव्हरवर बसून चमचमती मुंबई पाहण्याची गंमत तिथेच अनुभवता येते. कपल्ससाठी हे ठिकाण ब-यापैकी सेफ आहे. परंतु मध्यंतरी याच ठिकाणी मित्रासोबत फिरायला आलेल्या एका मुलीवर एका पोलिसाने भर पोलिस चौकीतच बलात्कार केला होता, हे विसरुन चालणार नाही.

वरळी सी फेस हल्ली क्राऊडेड झालाय. शनिवारी-रविवारी तर इथे पाय ठेवायला जागा नसते. सगळे फॅमिलीवाले जमत असल्याने प्रेमी कपल्सची गोची होते. आता तर वांद्रे-वरळी सी लिंक इथेच रिकामा होणार असल्याने सी फेसवरचं ट्रॅफिक आणखी वाढणार. नाही म्हणायला वरळी कोळीवाड्याच्या बाजूला असलेल्या छोट्या गार्डनचा आधार तेवढाच कपल्ससाठी उरलाय. या गार्डनमध्ये एवढ्या दाटीवाटीने कपल्स बसलेली असतात की, आपल्या माणसाच्या खांद्यावर हात टाकावा तरी तो तिस-यापर्यंत पोहोचतो. मग 'सॉरी...', 'एक्स्क्यूज मी...' वगैरे फॉर्मलिटीज पाळाव्या लागतात.

गेट वे ऑफ इंडियावर हौशे, नवशे, गवशे यांचीच कायम गर्दी. देशी-विदेशी पर्यटकांची संख्या तिथे जास्त. तरीही प्रेमी कपल्स गेट वेला आवर्जून हजेरी लावतातच. गर्दीपासून थोडं दूर ताजच्या समोर किंवा रेडिओ क्लबच्या दिशेने त्यांना आपला मोर्चा वळवावा लागतो. ज्यांना समुद्रातून एक फेरफटका मारुन यायचा असेल त्यांच्यासाठी इथं लाँचची व्यवस्था आहे. रात्रीच्या वेळी समुद्रातून गेट वे आणि ताजचा परिसर खूपच सुंदर दिसतो. अशीच एखादी चाँदनी रात आवडीच्या माणसासोबत अनुभवण्यासाठी ही लाँच फेरी एकदम मस्त.

सागर किनारे, दिल ये पुकारे... गुणगुणत.

- सुनील घुमे